Уезду ў ЕС чакаюць амаль 2 200 легкавушак. У мытні нагадалі пра электронную чаргу

Праблема чэргаў на мяжы зноў актуалізавалася адразу пасля новага года. Размова ідзе толькі аб польскім кірунку, прычым калі з фурамі ў "Казловічах" усё ў парадку, то з легкавушкамі і аўтобусамі ёсць пытанні.

Паводле інфармацыі Дзяржпагранкамітэта, 10 студзеня а 8-й раніцы перад пунктам пропуску "Цярэспаль" (з нашага боку гэта "Брэст") стаяць амаль 2 200 легкавушак. З аўтобусамі сітуацыя стала ледзь лепей. Напярэдадні іх было 60, зараз 6. Многія з турыстаў спазніліся на авіярэйсы. У сярэднім за гадзіну сумежны бок прымае 1-2 аўтобусы.

Але самая вялікая праблема ў тым, што польскія пагранічнікі працягваюць павольна афармляць легкавы транспарт. Пры норме пропуску 1 700 аўтамабіляў за суткі службы суседняй краіны прымаюць не больш як 700, гэта значыць каля 40 % ад нормы. А напярэдадні ў Брэсцкай мытні распавялі, што гэты паказчык упаў да 30 %.

У сваю чаргу ў мытні нагадалі, што ў вадзіцеляў легкавых аўто ёсць магчымасць зарэгістравацца ў электроннай чарзе і пасля прыехаць на мяжу да неабходнага часу. Такі кейс карыстаецца папулярнасцю, бо чакаць легкавушкам прыходзіцца і па некалькі дзён. А значыць, людзі, зарэгістраваўшыся, могуць правесці гэты час дома.