Заязджай у зіму на правільнай гуме. Даведаліся, чаму не трэба адкладваць паездку на шынамантаж

Рух па магістралях з асаблівай асцярожнасцю і толькі на зімовай гуме. Замяніць абутак для аўто неабходна як мага хутчэй. Пра гэта нагадваюць вадзіцелям супрацоўнікі ДАІ.

У Мінскай вобласці дарожныя міліцыянеры праводзяць рэйды падчас прафілактычнай акцыі " Мяняй свой стыль на зімовы!" Ілья Цвяткоў раскажа падрабязна.

Бяспека за рулём залежыць ад стылю кіравання, а ў марозны сезон яшчэ і ад гумы на колах. Дзяржаўтаінспекцыя Мінскай вобласці рэкамендуе як мага хутчэй змяніць абутак аўто на зімовы, каб пазбегнуць ДТЗ.

Каб паскорыць працэс замены сезоннай гумы, ДАІ дзяжурыць на хуткасных магістралях. З вадзіцелямі    праводзяць прафілактычныя размовы, бо на вялікай хуткасці добрае счапленне з асфальтам асабліва важна.

Для тых, хто паспеў змяніць гуму, свае рэкамендацыі, бо шыны не толькі павінны быць са спецыяльнай зімовай маркіроўкай, але і адпавядаць мінімальна дапушчальным параметрам па зносе пратэктара. Яго вышыня павінна быць не менш за 4 міліметры. Тады гума зможа эфектыўна спрацаваць пры тармажэнні.

Паводле правілаў дарожнага руху, змяніць гуму неабходна не пазней за 1 снежня і выкарыстоўваць яе мінімум да 1 сакавіка. Але лепш за ўсё арыентавацца на ўмовы надвор'я.

Яшчэ адна нагода не зацягваць з заездам на шынамантаж - чэргі. Ужо цяпер ахвотнікаў скарыстацца паслугамі спецыялістаў  дастаткова. Напрыклад, на тэхстанцыі ў Дзяржынску без папярэдняга запісу трапіць няпроста.

У сярэднім па Мінскай вобласці за суткі рэгіструецца каля 30 ДТЗ.

У асноўным прычына такіх сітуацый - перавышэнне хуткаснага рэжыму і парушэнне правілаў манеўравання (рэзкія абгоны і перастраенні), асабліва на слізкай дарозе. Таму ДАІ раіць ужо цяпер перайсці на больш асцярожны зімовы стыль кіравання.