Жывыя карціны. Сучасныя тэхналогіі дазваляюць убачыць, як кавалася Вялікая Перамога

Старонкі гісторыі Вялікай Перамогі ажываюць з дапамогай нейрасетак. Інтэрактыўны праект "За дзень наступны ўсяе зямлі" працягвае сваё падарожжа ў часопісе "Мастацтва".

З дапамогай нейрасетак для чытачоў арганізуецца экраннае ўзаемадзеянне з падзеямі Вялікай Айчыннай вайны. Усе тэматычныя нумары змяшчаюць QR-коды, якія дазваляюць праглядаць анімацыі да ілюстрацый. Таксама падрыхтавана раздрукаваная серыя карцін вялікага фармату, якая будзе экспанавацца ў рэгіёнах Беларусі.

"У нас ужо 12 карцін убачылі свет. Яны жывыя, яны рухаюцца. Карціны здабылі сваіх першых гледачоў. І далей нашы карціны паедуць па ўсёй краіне. Хочам, каб як мага больш людзей убачылі гэта, і асабліва маладое пакаленне", - адзначыла дырэктар рэдакцыйна-выдавецкай установы "Культура і мастацтва" Наталля Кузняцова.

Праект, прымеркаваны да 80-годдзя вызвалення Беларусі ад нямецка-фашысцкіх захопнікаў, быў запушчаны ў 2024 годзе. У ім задзейнічаны самыя буйныя музеі Беларусі - Нацыянальны мастацкі і Музей гісторыі Вялікай Айчыннай.

Палотны дастаўляюцца з фондаў, а ажыўленнем ваенных шэдэўраў займаюцца студэнты Акадэміі мастацтваў. За год будзе падрыхтавана 12 тэматычных нумароў з анімацыяй. Новы нумар часопіса адкрыла карціна Івана Ахрэмчыка "Абаронцы Брэсцкай крэпасці".