Аліна Гарнасько стала абсалютнай пераможцай на этапе Кубка выкліку ў Партугаліі

Прадстаўніца Беларусі Аліна Гарнасько стала абсалютнай пераможцай этапу сусветнага Кубка выкліку па мастацкай гімнастыцы, які прайшоў у Партымау (Партугалія), паведаміла БЕЛТА.

На партугальскім этапе турніру грацыі вызначылі наймацнейшых у мнагабор'і і чатырох асобных практыкаваннях - лідар нашай каманды атрымала перамогі ў кожным відзе праграмы. Напярэдадні Аліна з саліднай перавагай заваявала золата ў мнагабор'і (115,250 бала), а 11 мая выйграла фіналы з абручом (29,250), мячом (27,950), булавамі (29,100) і стужкай (27,000). Двухразовым прызёрам спаборніцтваў стала яшчэ адна беларуска Анастасія Салас, якая паказала другі вынік у практыкаванні з абручом і трэці - са стужкай.

Раней у гэтым сезоне Гарнасько двойчы паднімалася на подыум этапаў Кубка свету, узяўшы серабро ў праграме з мячом у Сафіі і бронзу ў гэтай жа дысцыпліне ў Баку. На рахунку Салас трэцяе месца азербайджанскага этапу ў кампазіцыі з абручом. Фінальны турнір Кубка свету па мастацкай гімнастыцы 2025 года пройдзе з 18 па 20 ліпеня ў Італіі, а заключны этап Кубка выкліку адбудзецца з 25 па 27 ліпеня ў Румыніі.