Аляксандр Лукашэнка павіншаваў Кірсці Кавентры з абраннем на пасаду прэзідэнта МАК

Двухразовая алімпійская чэмпіёнка па плаванні, член Выканкама Міжнароднага алімпійскага камітэта Кірсці Кавентры з Зімбабвэ абраная новым прэзідэнтам Міжнароднага алімпійскага камітэта.

Выбары адбыліся на 144-й сесіі арганізацыі, якая праходзіць на грэчаскім курорце Коста-Наварына. Для забеспячэння таямніцы галасавання выбарчы працэс праходзіў за зачыненымі дзвярамі і не трансліраваўся. У зале пасяджэння падчас працэсу выбараў не дапускалася наяўнасць у прысутных якіх-небудзь электронных прылад. Тэрмін паўнамоцтваў Кірсці Кавентры пачнецца 24 чэрвеня 2025 года і прадоўжыцца 8 гадоў.

Томас Бах, які кіраваў арганізацыяй з 10 верасня 2013 года, пакіне пасаду сёлета  ў чэрвені і па рашэнні 144-й сесіі камітэта стане пажыццёвым ганаровым прэзідэнтам МАК. Усяго на пасаду кіраўніка арганізацыі прэтэндавалі сямёра кандыдатаў.

Аляксандр Лукашэнка павіншаваў Кірсці Кавентры з абраннем на пасаду прэзідэнта Міжнароднага алімпійскага камітэта: "Перакананы, што пад Вашым кіраўніцтвам міжнародны алімпійскі рух зможа ўнесці важкі ўклад ва ўмацаванне сяброўства і паразумення паміж народамі і краінамі, забеспячэнне даступнасці спорту для ўсіх. Жадаю моцнага здароўя і поспехаў у служэнні высокім мэтам і ідэалам Алімпізму".