Беларус Антон Смольскі заняў другое месца ў пасьюце на этапе Кубка Расіі па біятлоне

Беларус Антон Смольскі стаў прызёрам гонкі праследавання на чацвёртым этапе Кубка Расіі па біятлоне, які праходзіць у Разані, паведамляе БЕЛТА.

Замест звыклых для пасьюта 12,5 км мужчыны прабеглі толькі 7,5 км - арганізатары скарацілі дыстанцыю з-за анамальнага для студзеня цёплага надвор'я, якое не дазволіла падрыхтаваць трасу цалкам. Таксама былі зменшаны разрывы паміж гоншчыкамі на старце - напярэдадні ў спрынце Дзмітрый Лазоўскі перамог з перавагай 24 секунды, ад якой сёння засталося толькі 12.

Пасля паловы гонкі Лазоўскі захоўваў першы радок, але на стойцы беларус дапусціў тры промахі і адкаціўся за межы тройкі. На лідзіруючую ролю ў нацыянальнай камандзе вярнуўся Антон Смольскі - на чатырох агнявых рубяжах прызёр пекінскай Алімпіяды памыліўся ўсяго раз, дзякуючы чаму падняўся з 15-й стартавай пазіцыі на другую на фінішы.