Смольская і Варабей заваявалі серабро ў адзіночнай эстафеце на Кубку Садружнасці па біятлоне

Беларускія біятланісткі сталі прызёрамі адзіночнай эстафеты на заключным этапе Кубка Садружнасці ў Мурманску, паведамляе БЕЛТА.

Удзел у новай дысцыпліне прынялі два беларускія дуэты і шэсць каманд з Расіі. Нашу краіну прадставілі пары Ксенія Варабей - Дзінара Смольская і Ірына Шаклеіна - Ганна Сола. Усе спартсменкі прабеглі па чатыры этапы са зменай пасля кожнай стральбы, на агнявых рубяжах у дзяўчат быў толькі адзін дадатковы патрон. На экватары гонкі дуэт Шаклеіна - Сола ішоў другім, Варабей і Смольская мелі пяты графік. Аднак затым сітуацыя ў эстафеце змянілася: Ірына і Ганна выпалі з тройкі, у той час як Ксенія і Дзінара падцягнуліся да лідараў.

У выніку Смольская фінішавала другой, саступіўшы Тамары Дзербушавай 8 секунд, партнёркай расіянкі ў гэтай гонцы была Вікторыя Сліўко. Трэці вынік паказалі Анастасія Халілі і Вікторыя Мяцеля, Шаклеірна і Сола занялі чацвёртае месца.

Мужчыны выйдуць на старт каманднага спрынту ў 13:00. У заявачным пратаколе 14 дуэтаў, у тым ліку тры пары з Беларусі.