Смольскі другі раз у кар'еры стаў пераможцам агульнага заліку Кубка Садружнасці

Беларускі спартсмен Антон Смольскі другі раз у кар'еры выйграў агульны залік Кубка Садружнасці па біятлоне, паведамляе БЕЛТА.

Перад заключным этапам галоўнага міжнароднага турніру для беларускіх біятланістаў лідар нашай каманды апярэджваў праследвальнікаў у агульным заліку больш чым на дзве сотні ачкоў. Для датэрміновага заваявання трафея Антону ў пятнічным спрынце спатрэбілася проста даехаць да фінішу - у выніку беларус заняў сёмае месца і стаў недасягальным для сапернікаў перад нядзельным мас-стартам. Пераможцам агульнага заліку Кубка Садружнасці Смольскі стаў у другім сезоне запар.

У гэтым сезоне турніру сярэбраны прызёр пекінскай Алімпіяды атрымаў сем перамог - тры на першым этапе ў Краснаярску, адну на чацвёртым этапе ў Дёміна і тры на Кубку наймацнейшых спартсменаў у Раўбічах. Таксама ў асабістых гонках Кубка Садружнасці-24/25 у Смольскага два сярэбраныя медалі і яшчэ тры трапленні ў шасцёрку наймацнейшых.