Дзіцячы аздараўленчы цэнтр "Крыштальны" адкрыўся пасля рэканструкцыі. Даведаліся, што змянілася

Дзіцячы рэабілітацыйна-аздараўленчы цэнтр "Крыштальны" адкрылі ў Гомелі пасля рэканструкцыі. Аб'ект уключаны ў інвестпраграму Гомельскай вобласці на 2022 - 2024 гады.

Зараз гэта адзіная ў рэгіёне ўстанова для аздараўлення і пражывання дашкалят без бацькоў: толькі ў суправаджэнні выхавальнікаў.

Санаторый для дзяцей цалкам змяніў сваё аблічча.

Замест двухпавярховага, будынак на тры паверхі, побач пабудаваны з нуля шматфункцыянальны корпус з некалькіх блокаў. Плошчы ўкамплектавалі новым абсталяваннем айчыннай вытворчасці. Тут усё неабходнае для дзяцей з аслабленым здароўем. Для рэабілітацыі і адпачынку малых ва ўзросце ад 3 да 7 гадоў адкрылі 12 груп з камфортнымі спальнымі, гульнявымі і зонамі для адпачынку. Аздараўленчая база папоўнілася басейнам з мінеральнай вадой.

Першы заезд плануецца з 6 студзеня. Калі раней аздараўленчы цэнтр прымаў 97 чалавек за змену, то зараз тут будуць умацоўваць здароўе і набірацца сіл у два разы больш юных пацыентаў.