Музей Парфірыя Рубановіча адкрыўся ў Заслаўі

Заслаўе папоўнілася яшчэ адной духоўнай славутасцю: у горадзе адкрылі і асвяцілі музей-капліцу ў гонар свяшчэннапакутніка Парфірыя Заслаўскага.

Гэты святар служыў у Спаса-Праабражэнскім саборы ў пачатку мінулага стагоддзя, але стаў ахвярай эпохі ваяўнічага атэізму.

Парфірый Заслаўскі ўключаны ў Сабор беларускіх новапакутнікаў, памяць якіх узгадваецца ў гэтыя дні. Для таго каб ушанаваць памяць Парфірыя, у Заслаўе прыбыў Мітрапаліт Мінскі і Заслаўскі, Патрыяршы Экзарх усяе Беларусі Веніямін. Ён правёў ўрачыстае набажэнства і асвяціў музей-капліцу.

Музей-капліца размясцілася ў культурна-асветніцкім цэнтры імя Парфірыя Заслаўскага. Установа існуе пры прыходзе Спаса-Праабражэнскага сабора Заслаўя. Тут праходзяць заняткі нядзельнай школы, выставы мастакоў і творчыя сустрэчы.