Беларускія спартсмены выйгралі 36 медалёў турніру "Легенды гімнастыкі"

На базе Рэспубліканскага цэнтра алімпійскай падрыхтоўкі "Стайкі" падышоў да канца міжнародны турнір па спартыўнай гімнастыцы "Легенды гімнастыкі" з удзелам спартсменаў з чатырох краін, піша БЕЛТА.

Праграму спаборніцтваў завяршылі фіналы ў асобных відах сярод юніёраў і юніёрак. У дзяўчат перамогі на брусах і ў вольных практыкаваннях атрымала беларуска Сафія Штыхецкая, якая стала абсалютнай чэмпіёнкай дамашняга турніру. Раней яна святкавала поспех у мнагабор'і, а таксама ў практыкаванні на бервяне і ў апорным скачку. Двухразовым прызёрам у чацвер, 3 красавіка, стала і наша Ганна Залатухіна, якая ўзяла серабро на брусах і бронзу на дыване.

У практыкаванні на кольцах у хлопцаў лепшым быў беларус Уладзіслаў Басаргін, бронза ў гэтым відзе дасталася яго суайчынніку Арцёму Снятко. У апорным скачку першынстваваў наш Гардзей Перадзярэеў, другім размясціўся яго партнёр па камандзе Станіслаў Паўлючэнка. У практыкаванні на паралельных брусах беларусы Уладзіслаў Басаргін і Арсеній Баклага выйгралі серабро і бронзу адпаведна.

Такім чынам, усяго прадстаўнікі Беларусі заваявалі 36 медалёў турніру "Легенды гімнастыкі": 11 залатых, 13 сярэбраных і 12 бронзавых. Міжнародныя спаборніцтвы ў "Стайках" сабралі каля сотні гімнастаў з Беларусі, Расіі, Казахстана і Узбекістана.