МАК паказаў медалі зімовых Алімпійскіх і Паралімпійскіх гульняў 2026 года

Зараз усе спартсмены ведаюць, за што будуць змагацца - МАК паказаў медалі зімовых Алімпійскіх і Паралімпійскіх гульняў 2026 года, якія пройдуць у Італіі.

Урачыстая прэзентацыя ўзнагарод адбылася ў Венецыі.

Апошнім часам арганізатары летніх і зімовых Гульняў максімальна клапоцяцца аб экалогіі. Спаборніцтвы ў Італіі не стануць выключэннем, таму медалі будуць выраблены з перапрацаваных металаў. Іх выплавяць у індукцыйных печах, якія будуць працаваць выключна на аднаўляльных крыніцах энергіі.

Кожны медаль падзелены на дзве паловы, аб'яднаныя алімпійскімі кольцамі. Паводле задумкі дызайнераў, гэта сімвалізуе шлях атлетаў і ўсіх, хто ім дапамагае.