Ягор Рабцаў заваяваў бронзавы медаль на юніёрскім чэмпіянаце свету па фехтаванні

Беларускі рапірыст Ягор Рабцаў атрымаў бронзавы медаль на юніёрскім чэмпіянаце свету па фехтаванні 2025 года, які праходзіць у кітайскім горадзе Усі, інфармуе БЕЛТА.

Спартсмен з Беларусі стаў прызёрам планетарнага форуму ў фехтаванні на рапірах сярод юніёраў не старэйшых за 20 гадоў. На папярэднім этапе Ягор атрымаў пяць перамог у шасці паядынках, на старце раўнда на выбыванне адолеў украінцаў Арцёма Каржавога-Лернера і Яраслава Муругіна, далей Рабцаў прайшоў француза Антуана Спішыже і Рафаэля Тана з Сінгапура. У чвэрцьфінале беларус перамог Радміра Семянеева з Узбекістана, але ў паўфінале саступіў расіяніну Аляксандру Керыку і заваяваў бронзу, бо паядынкі за трэцяе месца на турніры не праводзяцца.

Гэты медаль стаў для беларускай каманды першым на чэмпіянаце свету ў Кітаі. Усяго ўдзел у спаборніцтвах рапірытсаў у хлопцаў да 20 гадоў прынялі 160 спартсменаў. 11 красавіка ва Усі вызначацца пераможцы і прызёры ў фехтаванні на рапірах сярод юнакоў і дзяўчат да 17 гадоў, у суботу адбудуцца камандныя спаборніцтвы. Праграму планетарнага форуму завершаць шпажысты, якія будуць выяўляць лепшых з 13 па 15 красавіка.