Зборная Беларусі па пляжным футболе ўпершыню выйграла серабро на чэмпіянаце свету

Беларусы па пляжным футболе ўпершыню сталі прызёрамі чэмпіянату свету, заваяваўшы сярэбраныя медалі, піша БЕЛТА.

11 мая ў паядынку за золата сусветнага першынства на Сейшэлах беларусы саступілі чэмпіёнам планеты бразільцам з вынікам 3:4. Гэта першы такі поспех беларускіх каманд у гульнявых відах спорту.

На шляху да фінальнага матча беларускія падапечныя іспанскага спецыяліста Нікаласа Альварада сталі лепшымі ў папярэдняй групе А, выйграўшы ў каманд Сейшэльскіх астравоў (6:3), Японіі (6:3) і Гватэмалы (12:3). У чвэрцьфінале былі абыграны іранцы (4:3), а ўчора ў паўфінале беларусы ўзялі верх над сенегальцамі - 5:2.

Зборная Беларусі чацвёрты раз гуляла ў фінальных стадыях сусветных чэмпіянатаў: у 2024 годзе беларусы занялі чацвёртае месца, у 2019-м і 2021-м не змаглі прабіцца ў плэй-оф.

Чэмпіянаты свету па пляжным футболе пачалі праводзіцца з 1995 года, з 2005 года яны праходзяць пад эгідай ФІФА. Зборная Бразіліі 16 разоў выйгравала золата, па тры чэмпіёнскія тытулы ў каманд Партугаліі і Расіі, адзін раз першынствавалі французы. У фінальным матчы ЧМ-2024 у Дубаі бразільцы перамаглі італьянцаў з лікам 6:4, а ў гульні за бронзу іранцы апынуліся мацнейшымі за беларусаў - 6:1.