Абмежаванні на наведванне лясоў уведзены ўжо ў 21 раёне Беларусі

Паводле інтэрактыўнай карты Мінлясгаса, доступ у лясы часова абмежаваны ў 21 раёне краіны, піша БЕЛТА.

Абмежаванні дзейнічаюць у чатырох абласцях. Гэта Бярозаўскі, Брэсцкі, Драгічынскі, Жабінкаўскі, Іванаўскі, Івацэвіцкі, Кобрынскі, Лунінецкі, Маларыцкі, Пінскі, Пружанскі і Столінскі раёны Брэсцкай вобласці, Віцебскі раён Віцебскай вобласці, Буда-Кашалёўскі, Веткаўскі, Гомельскі, Добрушскі і Чачэрскі раёны Гомельскай вобласці, а таксама Бераставіцкі, Ваўкавыскі і Свіслацкі раёны Гродзенскай вобласці.

У ведамстве просяць устрымацца ад наведвання лясоў, а пры неабходнасці знаходжання ў лесе выконваць правілы пажарнай бяспекі.

Плануючы паход у лес, варта даведацца пра актуальную сітуацыю ў канкрэтным раёне. Інтэрактыўная карта на партале ведамства пастаянна абнаўляецца ў залежнасці ад змянення сітуацыі, у тым ліку ўмоў надвор'я.

.