Дабрачынная акцыя "Мост дружбы" звязвае Беларусь і Кітай ужо 20 гадоў

Кітай перадаў гуманітарную дапамогу Дзіцячаму рэабілітацыйна-аздараўленчаму цэнтру "Ждановічы" ў рамках дабрачыннай акцыі "Мост дружбы".

Добраму марафону ўжо 20 гадоў, столькі ж і супрацоўніцтву цэнтра з пасольствам Кітая. Толькі за апошнія 10 гадоў установа атрымала ад кітайскіх партнёраў дапамогу на суму каля 200 тыс. долараў. Грошы пайшлі на рэканструкцыю спартыўных пляцовак, набыццё новага сучаснага лячэбнага абсталявання. У 2025 годзе гуманітарную дапамогу накіравалі на набыццё двух кухонных апаратаў і крэслаў у сталовую.

Ужо больш за 25 гадоў цэнтр паспяхова дапамагае тысячам юных беларусаў умацаваць сваё здароўе. Штогод тут атрымліваюць якасныя медыцынскія паслугі больш за 7 тыс. хлопчыкаў і дзяўчынак. Зараз у цэнтры праходзяць аздараўленне каля 400 дзяцей.