Гарачыя прапановы: турыстычныя маршруты па Мінскай вобласці распрацоўваюць для замежных гасцей

Каб раскрыць турыстычны патэнцыял сучаснай і аўтэнтычнай Беларусі, гарачыя прапановы, у тым ліку з маршрутам па Мінскай вобласці, распрацоўваюць для замежных гасцей.

Так, турпрадстаўнікі з Расіі і Узбекістана абмеркавалі сумесны праект з Беларускай федэрацыяй прафсаюзаў.

Пабываць самому і расказаць іншым пра турыстычную прывабнасць і аўтэнтыку Беларусі - такім прынцыпам кіруюцца прадстаўнікі амаль 40 профільных фірм і арганізацый з розных гарадоў Расіі і Узбекістана, якія прыехалі да нас. На сваёй радзіме яны займаюцца арганізацыяй экскурсій і вандровак у розныя краіны свету, таму ўразіць праграмай ці краявідамі турыстычных знаўцаў няпроста.

Ад трансферу і бонуснай праграмы да ВІП-тураў і патрыятычнага турызму для падлеткаў - такія тэмы цікавілі гасцей. У найбліжэйшым календары экскурсій - святочныя маршруты з навагодняй праграмай. Такія туры прапануюцца для сямейнага адпачынку.

Для гасцей з Расіі і Узбекістана арганізавалі пяцідзённае падарожжа па Гродзенскай і Брэсцкай абласцях праз сталіцу з маляўнічым фіналам у "беларускай Швейцарыі" - на лагойскай зямлі.

"Мы пастараліся паказаць не толькі інфраструктуру Федэрацыі прафсаюзаў Беларусі: нашы турыстычныя базы, санаторыі, гасцініцы, але і паказаць славутасці нашай краіны. Вядома ж, для нас вельмі важна, каб нашы суседзі з РФ і сябры з Узбекістана прыехалі і прывезлі арганізаванага турыста", - адзначыла старшыня Беларускага прафсаюза работнікаў культуры, інфармацыі, спорту і турызму Таццяна Філімонава.

Больш дэталёвае супрацоўніцтва і перспектыўныя турыстычныя напрамкі для кожнага рэгіёна абмеркавалі падчас дыялогавай пляцоўкі. У актуальным навігатары - гістарычны, аздараўленчы, патрыятычны і экалагічны маршруты.

Пра гасціннасць беларусаў красамоўна гавораць і лічбы. Толькі летась Мінскую вобласць для адпачынку выбралі звыш 140 тысяч замежных гасцей. І гэта выключна арганізаваныя групы турыстаў, без уліку тых, хто самастойна пракладвае экскурсійныя шляхі і адкрывае для сябе Беларусь.