Вярхоўны Суд Беларусі разгледзіць крымінальную справу ў дачыненні да калабаранта Смоўскага

Яшчэ аднаго ката Хатыні будуць судзіць у Беларусі. 19 лістапада Вярхоўны суд разгледзіць крымінальную справу ў дачыненні да Канстанціна Смоўскага, якога абвінавачваюць у генацыдзе беларускага народа ў гады Вялікай Айчыннай вайны.

Задакументаваныя злачынствы, апытанне сведак і архіўныя звесткі аб дзеяннях калабаранта займаюць 49 тамоў крымінальнай справы. Канстанцін Смоўскі - ураджэнец Украіны, трапіў у нямецкі палон, дзе пазней стаў супрацоўнічаць з акупацыйнымі войскамі. З'яўляўся кіраўніком 118-га ахоўнага батальёна.

Устаноўлена 26 эпізодаў яго злачыннай дзейнасці, у тым ліку і ў Хатыні. Пасля Другой сусветнай вайны калабарант эміграваў у Заходнюю Германію, а затым у ЗША, дзе ў 1960 годзе памёр у Мінеапалісе. Да самай смерці Смоўскі не прыцягваўся да адказнасці за ваенныя злачынствы.