Палац Незалежнасці зноў прымаў гасцей

Беларусь даказвае: праца чалавека каштоўная не на словах, а на справе.

Палац Незалежнасці сёння зноў прымаў гасцей. Яго дзверы адчыніліся для тых, хто абараняў і абараняе эканамічную бяспеку краіны.

А менавіта для ветэранаў і дзеючых супрацоўнікаў Дзяржаўнага мытнага камітэта. Усяго больш за 100 чалавек. Гэта людзі, чыё жыццё і кар'ера сталі неад'емнай часткай гісторыі нашай краіны.

Гасцям распавялі пра стварэнне палаца, паказалі знакамітыя залы і кабінеты, дзе вырашаюць важныя для дзяржавы пытанні. Але і гэта яшчэ не ўсё.

Экскурсанты добра падрыхтаваліся і прыехалі з прэзентам. У знак павагі мытнікі перадалі Прэзідэнту куст каліны. А гэта сімвал любові, адданасці і вернасці.

Сімвалічна, што экскурсія прайшла ў Дзень ветэранаў мытнай службы, а гэта не проста свята. Гэта прызнанне заслуг тых, хто доўгія гады з гонарам служыў у сістэме і працягвае перадаваць свой вопыт наступнаму пакаленню. Як адзначылі самі экскурсанты, гэты дзень ім запомніцца на ўсё жыццё. Бо не так шмат краін, дзе дзверы галоўнага сімвала краіны адчынены для простых людзей.