Штраф і нават крымінальная адказнасць. Лоўля шчупака пад забаронай зараз і ў Віцебскай вобласці

У Віцебскай вобласці ўступіла ў сілу часовая забарона на лоўлю шчупака, паведамляе БЕЛТА са спасылкай на Дзяржаўную інспекцыю аховы жывёльнага і расліннага свету пры Прэзідэнце Рэспублікі Беларусь.

Забарона ўжо дзейнічае па 15 красавіка ў рыбалоўных угоддзях Брэсцкай, Гомельскай, Гродзенскай, Мінскай і Магілёўскай абласцей. На Віцебшчыне яна прадоўжыцца па 23 красавіка.

"Выпадкова злоўленага шчупака трэба неадкладна выпусціць у натуральнае асяроддзе пражывання", - нагадваюць у Дзяржінспекцыі.

Лоўля шчупака вабіць як вопытных рыбакоў, так і навічкоў. Забарона на лоўлю звязана з неабходнасцю захавання папуляцыі рыбы падчас нерасту і падтрымання экалагічнага балансу ў вадаёмах краіны.

За парушэнні можна атрымаць штраф ад 10 да 30 базавых велічынь.

Таксама прыйдзецца кампенсаваць нанесены прыродзе ўрон: 9 базавых велічынь за кожную злоўленую рыбу. У выпадку прычынення ўрону на суму ад 100 базавых велічынь прадугледжана крымінальная адказнасць.

Паведаміць аб парушэннях прыродаахоўнага заканадаўства можна ў тэрытарыяльныя органы Дзяржаўнай інспекцыі або на тэлефон даверу: 8 (017) 39-00-000, 8 (033) 333-6-000.