Тайланд, Шры-Ланка, Фукуок - "Белавія" адкрывае новыя напрамкі для турыстаў

Авіякампанія "Белавія" адкрывае прамы рэйс у кітайскі Хайнань. Палёты па маршруце Мінск - Санья стартуюць з 8 кастрычніка.

Час у дарозе - 10 гадзін 20 хвілін. Маршрут назад зойме на гадзіну больш. Санья - галоўная курортная жамчужына вострава Хайнань. Асваенне новага напрамку дазволіць умацаваць гандлёва-эканамічныя і культурныя сувязі Беларусі і Кітая. Рэйсы будуць выконвацца адзін раз на тыдзень - у сераду - на далёкамагістральным самалёце Airbus A330-200.

У пачатку чэрвеня "Белавія" прэзентавала новы тып паветранага судна для грамадзянскай авіяцыі краіны.

"Час вылету з Мінска ў 4:40, прыбыццё ў Санью ў 20:00 па мясцовым часе. Мы аб'явілі аб адкрыцці рэйса з адной частатой на тыдзень, але зараз мы ўжо ацэньваем попыт, і магчыма ў найбліжэйшы час будуць дабаўлены дадатковыя рэйсы. Да канца 2025 года таксама плануецца адкрыццё чартарнай праграмы ў В'етнам на курорт Фукуок. Вядзецца работа па адкрыцці рэйсаў у Тайланд і на востраў Шры-Ланка", - падзяліўся планамі намеснік гендырэктара авіякампаніі "Белавія" Уладзімір Баркун.

У снежні 2024 года нацыянальны перавозчык адкрыў рэйсы з Мінска ў кітайскі Урумчы. Гэты маршрут папулярны ў прадстаўнікоў бізнесу.