Упершыню на поўначы Беларусі геолагі пачалі бурэнне параметрычнай свідравіны

Упершыню ў Віцебскай вобласці беларускія геолагі пачалі бурэнне свідравіны глыбінёй 1 350 м. У першую чаргу гэта сур'ёзная навуковая работа, якая дазволіць спецыялістам зрабіць высновы аб перспектывах дадзенай тэрыторыі з пункту гледжання карысных выкапняў.

На неабходнасць узмацнення работ па пошуку новых плошчаў залягання вуглевадародаў (а прасцей кажучы, нафты) звятаў увагу і Прэзідэнт Беларусі Аляксандр Лукашэнка.

У Сенненскім раёне, ля вёскі Ходцы, беларускія геолагі пачалі бурэнне параметрычнай свідравіны. Галоўнае пытанне, на якое спецыялістам трэба будзе знайсці адказ, - якія карысныя выкапні захоўваюць нетры рэгіёна.

І калі нетры поўдня краіны ўжо дастаткова вывучаныя, то на поўначы ўсё толькі пачынаецца. Спецыялісты прааналізавалі архіўныя звесткі і прыйшлі да высновы: свідраваць трэба на тэрыторыі Аршанскай упадзіны - яна мае асаблівую геалагічную будову. І ёсць усе перадумовы для знаходжання тут мінеральных рэсурсаў.

Ужо прайшлі больш за 20 м углыб. Гэта пакуль мала для таго, каб раскрыць усе перспектывы свідравіны. Важны комплексны падыход. Матэрыял перададуць у лабараторыі для паўнацэннага даследавання.

Звесткі, якія геолагі атрымаюць па выніках свідравання, лягуць у аснову далейшых геолагаразведвальных работ на прылеглых тэрыторыях.

Працы, як гавораць геолагі, вельмі шмат. Бурэнне свідравіны завершыцца ў 2025 годзе.