З 1 ліпеня Куба ўводзіць электронныя візы. Для беларусаў ёсць нюанс

Рэспубліка Куба з 1 ліпеня ўводзіць электронныя візы. Аб гэтым паведамляе БЕЛТА са спасылкай на пасольства краіны ў Беларусі.

У цяперашні час электронная віза дзейнічае нараўне са звычайным уязным дакументам. А з 1 ліпеня турысты змогуць трапіць на Кубу толькі па электроннай візе. Па меркаванні кубінскага боку, навіна дазволіць спрасціць перасячэнне мяжы.

Аднак, як растлумачылі ў пасольстве, ёсць нюанс, які датычыцца беларускіх турыстаў. Беларусы могуць знаходзіцца на Кубе без візы да 30 дзён, што прадугледжана міжурадавым беларуска-кубінскім пагадненнем аб узаемных бязвізавых паездках. Такім чынам, новаўвядзенні з электроннай візай не датычацца беларускіх турыстаў, якія па-ранейшаму могуць наведваць Кубу без візы на перыяд да 30 дзён.