16 чэрвеня ў праваслаўных хрысціян пачынаецца Пятроў пост

У праваслаўных вернікаў 16 чэрвеня пачынаецца Пятроў пост, піша БЕЛТА.

Пост устаноўлены ў гонар святых апосталаў, якія пасля сыходжання на іх Святога Духа разышліся па ўсіх краінах з добрай весткай, знаходзячыся заўсёды ў малітве і захоўваючы пост. Адны людзі, слухаючы іх, паверылі ў Бога, другія - раззлаваліся і захацелі іх загубіць. Многія з апосталаў закончылі сваё жыццё, як і Ісус, на крыжы або ў турме.

Пятроў пост нагадвае вернікам аб тым, што галоўны вораг, як гаворыць Евангелле, не той, хто забівае цела, а той, што пасяляецца ўнутры душы. Часта хрышчоны забывае пра любоў да Бога і блізкіх і вяртаецца да ранейшых грахоў. Аб гэтай небяспецы і нагадвае пост. Ён служыць выхаванню волі хрысціяніна, бо ў пост чалавек вучыцца падначальваць цялесныя патрэбы свайму духу, як гэта рабілі многія святыя.

Пятроў пост заўсёды пачынаецца з панядзелка, праз тыдзень пасля свята Святой Троіцы, таму кожны год дата яго пачатку розная. Затое завяршаецца пост заўсёды 12 ліпеня, у дзень памяці хрысціянскіх пакутнікаў апосталаў Пятра і Паўла.

Гэты пост адносна нястрогі. Рыба дазваляецца ва ўсе дні, акрамя панядзелка, серады і пятніцы. У панядзелак можна ўжываць гарачую ежу без алею. Серада і пятніца - строгі пост (сухая ежа): можна есці хлеб, вараную гародніну, садавіну, піць ваду, кампот. У астатнія дні дазваляюцца рыбныя, крупяныя, грыбныя стравы з алеем.