Беларуская навука нацэлена на вынік. У Мінску праходзіць сесія Аагульнага сходу НАН Беларусі

Беларуская навука нацэлена на вынік, а таксама гатова адказаць на любы запыт прадпрыемстваў і дзяржавы. Пра гэта 25 красавіка гаварылі ў Мінску падчас сесіі Агульнага сходу Нацыянальнай акадэміі навук. Больш як 400 удзельнікаў вызначаюць вектары развіцця на будучыню.

Сёння нашы спецыялісты працуюць ва ўсіх сферах - ад мікраэлектронікі і космасу да новых матэрыялаў і аграрных тэхналогій. Толькі за 2024 год у эканоміку ўкаранёна больш як 300 распрацовак. Адны з іх - звышчыстае кварцавае шкло для мікраэлектронікі, створаныя РНК-вакцыны супраць анкалогіі, а таксама невялікая серыя электрамабіляў. Сумесна з Мотавелазаводам вялася праца над электраматацыклам.

Па колькасці сумесных ініцыятыў у навуковай сферы сярод усіх краін лідарам застаецца Расія. Сёння навукоўцы дзвюх краін ствараюць адзіную навукова-тэхнічную прастору. У фокусе ўвагі - космас, энергетыка, мікраэлектроніка, штучны інтэлект, а таксама здароўе чалавека і сельская гаспадарка. Зараз у распрацоўцы новы спадарожнік дыстанцыйнага зандавання Зямлі. Разам з тым навукоўцы разам распрацоўваюць інтэлектуальную электроніку, робатаў і электрарухавікі для аўтамабіляў, лазерныя комплексы для сістэм сувязі.