Белтэлерадыёкампанія правядзе трансляцыі велікодных богаслужэнняў

У Беларусі, дзе стагоддзямі падтрымліваецца міжканфесійны мір, у ноч на нядзелю пройдуць урачыстыя велікодныя богаслужэнні. Праваслаўныя і католікі здзейсняць хрэсныя хады, а званы ўзвесцяць пра Уваскрэсенне Хрыстовае. Трансляцыі святочных богаслужэнняў пройдуць у эфіры тэлеканалаў медыяхолдынга Белтэлерадыёкампаніі.

19 красавіка - Вялікая субота. Гэты дзень цішыні правядзём ва ўнісон з тэлеканалам "НТБ-Беларусь". А 13-й гадзіне пачнецца трансляцыя з Іерусаліма "Сыходжанне Жыватворнага агню" ў храме Гроба Гасподня.

Ужо ўвечар адразу два тэлеканалы будуць трансліраваць велікодныя службы з Мінска. На "Беларусь 1" і "Беларусь 24" у 21:45 пачынаецца трансляцыя з Архікафедральнага касцёла Імя Найсвяцейшай Панны Марыі. Затым эфір працягне трансляцыя святкавання Уваскрэсення Хрыстовага па праваслаўным календары - са Свята-Духава кафедральнага сабора. Узначаліць яго Мітрапаліт Мінскі і Заслаўскі, Патрыяршы Экзарх усяе Беларусі Веніямін.

Раніцу светлага Хрыстова Уваскрэсення сустрэнем разам з тэлеканалам "Беларусь 1". У 8:40 са святочным словам выступіць архіепіскап Іосіф Станеўскі. А ў 8:50 да праваслаўных вернікаў звернецца мітрапаліт Веніямін.

У гэты ж дзень у 15:30 на трэцяй кнопцы пачуем традыцыйнае пасланне "Граду і свету" з Ватыкана. Гэта благаславенне выступае сімвалам міру і добрай волі для ўсіх хрысціян.