Фотазоны і інсталяцыі для сэлфі на памяць. 1418 кампазіцый дапоўняць святочны вобраз Мінска

Радасць Перамогі, гістарычная праўда і памяць адлюстраваны ў мастацкім афармленні горада-героя Мінска.

Беларуская сталіца патанае ў кветках: экакампазіцыі ўпрыгожваюць вуліцы, праспекты і плошчы. Да 9 Мая "распусціліся" арт-ініцыятывы ў гонар 80-годдзя вялікага дня.

"У горадзе будзе вельмі шмат яркіх, эфектных святочных фотазон, дзе можна будзе зрабіць выдатныя фатаграфіі, сэлфі. Напрыклад, на плошчы каля Камароўскага рынку будзе шэраг фотазон "Песні Перамогі". Яшчэ адна цікавая фотазона будзе на плошчы Якуба Коласа. Тут можна будзе азнаёміцца з радамі войскаў Чырвонай Арміі. Кампазіцыі аб'ёмныя", - расказала начальнік аддзела дызайну ДП "Мінскрэклама" Таццяна Бугаркова.

Кастрычніцкую плошчу ўпрыгожваюць габарытныя ўстаноўкі: 4 кампазіцыі па 12 метраў кожная.

Сёлета 1418 кампазіцый дапоўняць урачысты вобраз Мінска да 9 Мая (у знак памяці аб кожным дні на шляху да Перамогі).

На плошчы Незалежнасці фасад педагагічнага ўніверсітэта ўжо ўпрыгожвае 40-метровае мегапано. Гэта брэнд гарадскога дэкору. Выканана яно ў ручной тэхніцы. Колеравая гама - золата на чырвоным з сімваламі пераможнага мая.

У патрыятычных ініцыятывах задзейнічалі штучны інтэлект. На гарадскіх экранах літаральна ажывуць карціны, асобы і аб'екты. Увазе знаўцаў мастацтва прапанавана выстава рэпрадукцый у парку Чалюскінцаў "Вялікі поступ Перамогі".

Невычэрпная крыніца народнай радасці і падзяка мужнаму пакаленню за подзвіг атрымаюць і лірычную агранку. Насычанае музычнае афармленне да 9 Мая будзе ў адзінай канцэпцыі на ўсіх сцэнах горада.

У цэнтры Мінска будзе разгорнута актыўная выставачная зона, у тым ліку з ваеннай тэхнікай таго часу, расказала галоўны рэжысёр святочнай праграмы Наталля Аўдзеенка. Таксама будзе шмат цікавых лакацый.

Інтэрактыўная гістарычная выстава, Алея баявой славы доблесных салдат і амфітэатр - тры фундаментальныя праекты размесцяцца на пляцоўцы ў Верхнім горадзе. Каларытная атмасфера будзе створана і каля Палаца спорту.

"Канцэрт будзе складацца з некалькіх эпізодаў. Адзін з іх - хроніка Перамогі. Беларусь партызанская, Беларусь у тыле, бо мы ведаем, што амаль 90 прадпрыемстваў пераабсталяваліся і пачалі працаваць у тыле", - расказала Наталля Аўдзеенка.

У 23 гадзіны неба над начным Мінскам расфарбуюць промні светлавой феерыі. Салют стане фінальным акордам усенароднай урачыстасці ў гонар 80-га дня Вялікай Перамогі.