"Калядныя чытанні" пройдуць у Мінску

Традыцыйная адукацыйная ініцыятыва Беларускай праваслаўнай царквы - "Калядныя чытанні" - напярэдадні свайго старту.

28 лістапада ў Мінску пройдзе ўрачыстае адкрыццё праекта, які на працягу месяца будзе запрашаць гасцей і ўдзельнікаў на самыя разнастайныя мерапрыемствы: гэта выставы, лекторыі і круглыя сталы, літаратурны конкурс кнігі і дыялогавыя пляцоўкі, заняткі па секцыях і місіянерскія сустрэчы.

Неафіцыйна чытанні пачаліся, паведамілі арганізатары падчас прэс-канферэнцыі. Стартам праекта стаў паказ кінастужак, прысвечаных дзвюм святым Еўфрасінням - Полацкай і Маскоўскай, а таксама служэнню Царкве падчас Вялікай Айчыннай вайны.

Сярод пляцовак чытанняў - Усіхсвяцкі храм і Мінская духоўная акадэмія, Нацыянальная бібліятэка Беларусі і адукацыйны цэнтр Дабрачыннага фонду Еўфрасінні Полацкай.

Да ўдзелу ў мерапрыемствах запрашаюцца свяшчэннікі, педагогі, медыцынскія і сацыяльныя работнікі, навукоўцы і студэнты.

Калядныя чытанні будуць праходзіць з 28 лістапада да 21 снежня.