Католікі і праваслаўныя святкуюць Ушэсце

Католікі і праваслаўныя 29 мая адзначаюць адно з вялікіх святаў - Ушэсце, піша БЕЛТА.

Ушэсце заўсёды прыпадае на чацвер, саракавы дзень пасля Вялікадня. Лічыцца, што старажытнае свята Ушэсця было ўведзена яшчэ ў апостальскія часы. Яно звязана з евангельскімі падзеямі, што адбыліся пасля Уваскрасення Хрыста. Набліжалася свята яўрэйскай Сёмухі, і апосталы разам з Прасвятой Дзевай Марыяй вярнуліся з Галілеі ў Іерусалім. У гэты час Сын Божы з'явіўся сваім вучням і вывеў іх з горада на гару Елеонскую. Там Збавіцель благаславіў апосталаў і абвясціў, што на іх пасланы Дух Святы і з гэтага часу яны будуць прапаведаваць хрысціянства паўсюль. Пасля гэтага Ісус узнёсся на неба. Калі светлае воблака схавала Хрыста ад вучняў, з'явіліся два анёлы і сказалі, што настане Другое прышэсце Госпада, а следам за ім - вечнае жыццё.

Ушэсце адкрыла праведным душам дарогу ў рай: дагэтуль людзям было адмоўлена ў нябеснай літасці за іх грахі. Гэтае вялікае свята дае вернікам надзею на тое, што шляхам самаадрачэння і ачышчэння яны змогуць наблізіцца да Бога.

У дзень Ушэсця царкоўная служба амаль дакладна паўтарае службу, што праводзіцца ў дзень Светлага Уваскрасення, а напярэдадні вечарам вернікі збіраюцца на ўсяночную.