Куцця Раства - заходнія хрысціяне рыхтуюцца да свята

Заходнехрысціянская царква рыхтуецца сустрэць галоўнае свята свайго календара. У католікаў і пратэстантаў Куцця Раства.

Заканчваецца пост,  24 снежня вечарам вернікі збяруцца на сямейную вячэру. Згодна з традыцыяй, пад абрусам павінна быць салома, на якую кладуць фігурку Хрыста, на святочным стале - 12 страў, і галоўнае - аплаткі (спецыяльна прыгатаваныя тонкія белыя перапечкі, якія дзеляць між сабой у знак прымірэння).

Юрый Касабуцкі, генеральны вікарый Мінска-Магілёўскай архіепархіі:

"У гэты дзень мы стараемся звярнуць ўвагу на наша сэрца, на нашу душу. Гэта дзень, калі мы імкнёмся прымірыцца адно з адным, каб у сем'ях панавала згода. Мы хочам сёння дзяліцца ўвечары аплаткай - гэта знак нашага прымірэння, еднасці і перш за ўсе знак супакою. Гэта свята сямейнае. Мы хочам ачысціць свае сэрцы, каб вечарам прыйсці ў святыню альбо злучыцца онлайн з набажэнствам і пачуць гэты радасны вокліч аб Нараджэнні Езуса Хрыста. Усім жадаю прыемнага свята".

Беларускія касцёлы завяршаюць апошнюю падрыхтоўку да сустрэчы Раства Хрыстова. Храмы ўпрыгожаны ёлкамі і гірляндамі. Акцэнт свята - імправізаваная пячора з евангельскімі героямі і яслі, якія чакаюць немаўля-Хрыста.