Праваслаўныя адзначаюць адно з вялікіх святаў - Дабравешчанне

7 красавіка праваслаўныя вернікі адзначаюць адно з дванаццаці вялікіх святаў - Дабравешчанне, паведамляе БЕЛТА.

Гэтае свята ўстаноўлена ў памяць аб дні, калі Дзеве Марыі з'явіўся пасланы Богам Архангел Гаўрыіл і ўзвясціў: "Не бойся, Марыя, бо Ты здабыла Боскую ласку. Ты народзіш Сына і дасі імя яму Ісус. Ён будзе вялікі і назавецца Сынам Усявышняга, і Царству Яго не будзе канца". Лічыцца, што менавіта ў гэты дзень на Марыю сышоў Дух Святы і яна зачала Боганемаўля Ісуса.

Дабравешчанне штогод адзначаецца 7 красавіка (па новым стылі), роўна за дзевяць месяцаў да Нараджэння Хрыстовага, якое прыпадае на 7 студзеня. З даўніх часоў свята з'яўляецца адным з самых важных і шануемых у праваслаўі. На Русі верылі, што ў гэты дзень нават грэшнікаў не мучаць у пекле. Выконваць якую-небудзь работу строга забаранялася. Гавораць, што на Дабравешчанне і птушка не ўе гнязда.

Згодна з народнымі павер'ямі, Дабравешчанне абазначае прыход вясны, калі сам Бог благаслаўляе зямлю на сеянне, урадлівасць, гэта значыць на дабрабыт чалавечы.

У гэты дзень выпякалі просвіры, у якія ўкладвалася капейка (на шчасце). Акрамя таго, просвіры альбо змешвалі з насеннем, альбо закопвалі па баках палёў, ахоўваючы такім чынам будучы ўраджай. Існавала павер'е: якое надвор'е на Дабравешчанне, такім яно будзе і на Вялікдзень.