Глядзець анлайнПраграма ТБ
ПалітыкаЭканомікаПрэзідэнтГрамадстваУ свецеРэгіёныКультураЗдарэнніЗдароўеСпортТэхналогііКругагляд
РэлігіяГісторыяБудаўніцтва і ЖКГАрміяМоладзьАдукацыяСям'я і дзеціДумкаТранспартТурызмЭкалогія

Праваслаўныя вернікі адзначаюць Грамніцы

Выява

Праваслаўныя вернікі 15 лютага святкуюць Грамніцы. Гэта адно з вялікіх святаў праваслаўнага календара, якое стаіць у адным шэрагу з Раством і  Вадохрышчам, паведаміла БЕЛТА.

Паводле старазапаветнага закона, усякі першынец мужчынскага полу павінен быць прысвечаны Богу, аднак гэты абрад нельга было ажыццявіць раней, чым  праз 40 дзён пасля з'яўлення хлопчыка на свет. Бацькам трэба было не толькі прадставіць дзіця Богу, але і прынесці ачышчальную ахвяру. Дзеля выканання гэтага закона Марыя і Іосіф прынеслі немаўля Ісуса ў Іерусалімскі храм, а для ахвяры выбралі двух галубіных птушанят. Прасвятая Дзева Марыя не мела патрэбы ў ачышчэнні, але па глыбокай пакорлівасці яна падпарадкавалася закону.

У той час у Іерусаліме жыў старац Сімеон. Яму было адкрыццё, што ён не памрэ, пакуль не ўбачыць Збавіцеля. Падпарадкоўваючыся боскаму ўнушэнню, праведны старац з'явіўся ў храм і там убачыў цуд - Госпада ў абліччы немаўля. Сімеон аб'явіў Ісуса Збавіцелем. Звярнуўшыся да Божай Маці, Сімеон прадказаў ёй: "Вось з-за Яго будуць спрачацца ў народзе: адны выратуюцца, а другія загінуць. А табе самой зброя пройдзе душу". Гэта значыла, што Багародзіца будзе перажываць  вялікае гора за Сына, калі ён будзе пакутаваць.

У памяць аб гэтых падзеях і ўсталявана свята, якое сімвалічна абазначае сустрэчу Старога і Новага Запаветаў, сустрэчу народу Боскага са сваім Збавіцелем (Месіяй).

У дзень Грамніц ва ўсіх храмах праводзяцца святочныя літургіі і асвячаюцца свечкі. Гэтая традыцыя паходзіць каранямі ў старажытнасць, калі вернікі арганізоўвалі нешта накшталт крэснага ходу па горадзе, несучы ў руках запаленыя свяцільні. У гэты дзень у малітвах гучыць просьба да Бога аб тым, каб душы, асвечаныя Духам Святым, пазбягалі грахоўнай цемры.

У славянскай традыцыі Грамніцы - дзень, калі зіма сустракаецца з вясной: "Якое надвор'е на Грамніцы, такой будзе і вясна". Лічыцца, што калі 15 лютага адліга, вясна будзе ранняя і цёплая, а калі будзе халодны дзень - вясна халодная. Калі выпаў у гэты дзень снег - чакай зацяжную і дажджлівую вясну.