Шуміць-гуляе Масленіца, наперадзе Вялікі пост: аб традыцыях шчодрага тыдня і яго святкаванні

1 і 2 сакавіка па ўсёй краіне разгарнуліся масленічныя гулянні. Сёлета ў Беларусі зіма не злавалася, але прыйшоў час яе праводзіць. Ушанаванне асобным святам - цяпла, дабрыні, пяшчотных прамянёў - старажытная народная традыцыя, якую зберагаюць. І як і вякі таму пякуць сучасныя гаспадыні масленічны сімвал - сонечнае адлюстраванне, румяны блін.

"Бліны маглі быць розныя: бульбяныя, ячменевыя, жытныя, пшанічныя. Першыя два-тры дні гатавалі аўсяныя, а ўжо пасля маглі рабіць грэчневыя бліны, яны яшчэ завуцца грачанікі", - расказала Марыя Савіцкая, навуковы супрацоўнік Беларускага дзяржаўнага музея народнай архітэктуры і побыту.

Музей, размешчаны недалёка ад Мінска, - галоўны этнаскансен Беларусі. Навуковыя супрацоўнікі ўстановы могуць не горш за прафесійных кулінараў спячы бліны. Самыя папулярныя тут - пшанічныя. Вось народны рэцэпт са строчыцкай карчмы: закваску ўліць у міску. Яйкі, крышку солі і цукру ўзбіць. Дадаць мукі і напрыканцы - крыху алею. Тесца гатова!

Масленіца - агульнаславянскае свята, і галоўная страва на ім - бліны. Але ў кожнага народа ўсё ж былі свае рэцэпты і сакрэты. Напрыклад, мы, беларусы, доўгі час не мелі сланечнікавага алею і замест яго выкарыстоўвалі алей ільняны. Кожная сям'я вырошчвала лён: са сцябла ьрабілі адзенне, частку насення  пакідалі на наступную сяўбу і з часткі рабілі льняны алей.

Бліны пякуць па ўсёй Беларусі, і ў кожным рэгіёне свае непаўторныя рэцэпты. Напрыклад, такіх інгрэдыентаў, як у нарачанскіх блінах, вы нідзе не знойдзеце. "Сакрэт нарачанскіх бліноў заключаецца ў кропельцы чыстай нарачанскай вадзічкі і праменьчыку нашага мядзельскага сонейка", - расказала адна з мясцовых гаспадынь.

Мядзельская Масленіца са смакам і густам. Сёлета супрацоўнікі мясцовага цэнтра культуры вырашылі рэканструявяць старажытныя абрады на кожны з сямі дзён шчодрага тыдня: "Сустрэча", "Зайгрышы", "Ласун", "Цешчыны бліны". І кожны дзень свае гульні і забавы, песні і танцы.

"У нашым жыцці часам не хапае таго, каб проста скінуць з плеч усё і пабыць крыху са сваімі сябрамі, з землякамі", - падзялілася загадчыца метадычнага аддзела Мядзельскага раённага цэнтра культуры Ларыса Севярын.

Падтрымліваць пераемнасць пакаленняў, выхоўваць павагу да народных свят, да традыцый свайго народа - галоўная задача сучасных масленічных імпрэз. Таму самыя шматлікія і актыўныя ўдзельнікі свят - дзеці.

Шуміць-гуляе Масленіца. Наперадзе Вялікі пост - час ачышчэння. Спаліўшы масленічнае чучала як сімвал усяго дрэннага і папрасіўшы прабачэння адно ў аднаго на Дараваную нядзелю, ідзём да вясны. Вясне - дарогу!