Спраўдзілася мара - Карына Мурашка атрымала ў падарунак ад Прэзідэнта Беларусі насенне кавуна

Аднойчы школьніца Галавінскай сярэдняй школы Гомельскага раёна Карына Мурашка ўбачыла, як спее на прэзідэнцкай бахчы кавун. Дзяўчынка вырашыла ўзяць прыклад з кіраўніка дзяржавы і заняцца вырошчваннем салодкай ягады. Дзевяцікласніца напісала ліст у Адміністрацыю Прэзідэнта з просьбай дапамагчы ёй насеннем і… неўзабаве атрымала жаданае. Зараз Карына вывучае прамудрасці агранавукі, каб восенню сабраны ўраджай перадаць дзецям-сіротам.

Карына не стрымлівае эмоцый. Мара спраўдзілася - зараз у яе ёсць насенне кавуна з тых самых прэзідэнцкіх градак.

Каб перадаць дзяўчынцы падарунак, губернатару Гомельскай вобласці Івану Крупко нават прыйшлося затрымацца ў Мінску пасля нарады. У сваім лісце Карына напісала, што хацела б вырасціць добры ўраджай і потым абавязкова падзяліцца вынікамі сваёй працы.

"У лісце школьніцы вельмі добрыя, важныя мэты - перадаваць вырашчаны ўраджай у адну з школ-інтэрнатаў", - адзначыла прэс-сакратар Прэзідэнта Беларусі Наталля Эйсмант.

"Увогуле, Іван Іванавіч, у мяне ўжо ў руках гэтае насенне. Як мне пракаменціравалі, яно насамрэч на вагу золата, таму што насенне добрае, яго не так шмат, менавіта таго, што вырошчваецца на падворку ў Прэзідэнта. Папросім перадаць дзяўчынцы са словамі падзякі за тыя пажаданні, якія ў адрас кіраўніка дзяржавы яна напісала", - звярнулася Наталля Эйсмант да старшыні Гомельскага аблвыканкама.

Разам з насеннем кавуна Іван Крупко ўручыў Карыне выданне "Наш Прэзідэнт".

Для дзевяцікласніцы, якая цікавіцца гісторыяй сваёй краіны, яе развіццём на сучасным этапе, кніга ўяўляе выключную каштоўнасць, з'яўляецца крыніцай натхнення.

Іван Крупко, старшыня Гомельскага аблвыканкама:

"Дзяржава стварае ўсе ўмовы, каб наша моладзь змагла рэалізаваць усе свае ідэі. Пісьмом, якое ты напісала Прэзідэнту, з аднаго боку, напэўна, ты ўразіла сваіх аднакласнікаў, але і з другога боку, ты паказала, што няма нічога немагчымага".

Вырошчваць кавуны ад кіраўніка дзяржавы ў сям'і Мурашка вырашылі на сваім прысядзібным участку. Зараз самы час падрыхтаваць зямлю і прадумаць, дзе якую культуру пасадзіць. У гэтым Карыне дапамагаюць бацькі.

Юлія Мурашка, мама Карыны:

"Эмоцыі нас перапаўняюць. Гэта яе ідэя, якую мы падтрымалі. Мэта пастаўлена. А зараз гэта наш першы вопыт - бахчавыя. Будзем працаваць".

"З улікам нашага геаграфічнага размяшчэння з раніцы да вечара будзе сонца, мы ведаем, што бахчавыя любяць сонейка, вільгаць, і такім чынам ствараюцца перадумовы да добрага ўраджаю", - разважае тата Дзмітрый Мурашка.

Кавун - культура няпростая і патрабуе асаблівага догляду. У беларускім рэзка кантынентальным клімаце вырошчваць ягаду рэкамендуюць праз расаду. У маі саджаюць зярняткі, месяц укрываюць, рэгулярна паліваюць. Не трэба спяшацца пераносіць маладыя расліны ў адкрыты грунт.

Сабраным ураджаем Карына плануе падзяліцца з дзецьмі Улукоўскай школы-інтэрната. А таксама і сваёй гісторыяй, якая яшчэ раз даказвае, што мары спраўджваюцца, галоўнае - у іх верыць.