У Вярхоўным Судзе Беларусі расказалі, як будуць выкарыстоўваць штучны інтэлект у рабоце суддзяў

Штучны інтэлект стане памочнікам у рабоце суддзяў, аднак ніколі не заменіць рэальнага суддзю пры вынясенні судовага рашэння, заявіў журналістам першы намеснік старшыні Вярхоўнага Суда Беларусі Валерый Калінковіч, паведамляе БЕЛТА.

"З цягам часу будзем, - сказаў Валерый Калінковіч, разважаючы наконт магчымасці ўкаранення штучнага інтэлекту ў дзейнасць судоў. - Але іншая справа, што мы пакуль не гатовы і не лічым магчымым пускаць штучны інтэлект у вырашэнне тых судовых пытанняў, дзе патрабуецца ўключэнне паняцця справядлівасці. Гэтага адназначна не будзе. Мы ніколі не пойдзем на тое, каб справядлівае пакаранне чалавеку, які ўчыніў злачынства, спрабаваў прызначаць робат".

Па словах першага намесніка старшыні, разглядаюцца магчымасці ўкаранення штучнага інтэлекту, але для аблягчэння выканання шэрагу тэхнічных функцый, звязаных з правасуддзем. У прыватнасці, для аналізу вялікіх аб'ёмаў судовых рашэнняў.

Валерый Калінковіч падкрэсліў наступны падыход: строгае, але справядлівае чалавечае стаўленне да людзей. "Мы будзем дамагацца таго, каб гэта мела месца ў дачыненні, безумоўна,  да кожнага чалавека, які да нас звяртаецца", - адзначыў ён.