Убачыць, як жывуць манахі. У Жыровічах адкрыюць музей

У Жыровічах рыхтуецца да адкрыцця новы музей. У старым Архірэйскім доме, збудаваным яшчэ ў 19-м стагоддзі, - гісторыя Беларускай праваслаўнай царквы і самога Жыровіцкага мужчынскага манастыра. Стары, але каштоўны будынак рызыкаваў быць знесеным "пад нуль" і стаць аўтамабільнай паркоўкай.

Пакуль жа ў вітрынах знаходзяць свой лепшы ракурс рэлігійныя знаходкі з аўкцыёнаў. Дамангольскія нацельныя крыжы і біблейскія фаліянты... Але ўжо можна разгледзець і рэпрадукцыі фрэсак, якія ўпрыгожвалі інтэр'ер Свята-Успенскага сабора ў Жыровічах. Зараз выявы, што былі напісаны ў царкве ў перыяд багаборніцтва (у 50-я гады 20-га стагоддзя), схаваныя пад белай фарбай... Некаторыя залы музея яшчэ фарміруюцца.

Протадыякан Георгій Пшонка, памочнік намесніка Свята-Успенскага Жыровіцкага манастыра:

"Зрабіць келлю манаха. Прыкладна паказаць, як жывуць у простых бытавых умовах манахі. Драўляныя сцены, лавачка драўляная. Хочам пакласці яшчэ льняны сяннік, на якім можна спаць".

Жыровічы мадэрнізуюць "ад цэнтра да ўскраін"

Архірэйскі дом - як працяг адраджэння Жыровіч "ад цэнтра да ўскраін". Уся ж праграма па адраджэнні аграгарадка ўключае 30 аб'ектаў. Гэта даручэнне кіраўніка дзяржавы - прывесці не толькі манастырскі комплекс, але і цалкам Жыровічы ў належны выгляд.