Вялікі пост пачаўся ў праваслаўных вернікаў

У праваслаўных вернікаў 3 сакавіка пачаўся Вялікі пост - час малітваў, службаў, духоўных і цялесных подзвігаў, які завяршаецца ўрачыстасцю Светлага Хрыстова Уваскрэсення - Вялікаднем.

Вялікі пост - самы строгі і доўгі са шматдзённых постаў праваслаўнай царквы, піша БЕЛТА. Ён доўжыцца сем тыдняў і складаецца з уласна саракадзённага посту (Чатырохдзясятніцы), які ўвасабляе саракадзённы пост Ісуса Хрыста ў пустыні, і посту Перадвелікоднай сядміцы. Сёлета Вялікі пост прадоўжыцца з 3 сакавіка па 19 красавіка.

Першы і апошні тыдні Вялікага посту лічацца самымі строгімі. У суботу шостага тыдня царква ўспамінае цуд уваскрэсення Лазара Ісусам. За суботай - Вербная нядзеля, якая адкрывае Перадвелікодную сядміцу - апошні тыдзень посту, падчас якога ўспамінаюць аб пакутах Ісуса Хрыста.

Гаворачы пра Вялікі пост, праваслаўныя багасловы падкрэсліваюць, што аскеза  не столькі ў правільнай дыеце (як памылкова мяркуюць многія), колькі ў духоўным засяроджванні. У гэты перыяд вернікі прысвячаюць свой вольны час, свае намаганні спазнанню Творцы, развазе пра сэнс жыцця, пра душу, пра дабро і зло. У дні Вялікага посту хрысціянам рэкамендуецца адмовіцца ад забаўных мерапрыемстваў, курэння, ужывання алкаголю. Абавязкова трэба засяродзіцца на сваім унутраным стане і змагацца з праявамі гневу, крыўды, асуджэння.

Царква вучыць, што галоўнае ў Вялікім посце - чысціня духоўная. Меру ў перыяд посту варта выконваць ва ўсім. Глыбінная сутнасць посту ў тым, каб чалавек узвысіўся маральна, ачысціў сваю душу, напоўніўся любоўю і міласэрнасцю да навакольных.