Знойдзеныя ў Смалявіцкім раёне метэарыты прызнаныя ўнікальнымі геалагічнымі аб'ектамі

Знойдзеныя ў Смалявіцкім раёне Мінскай вобласці метэарыты прызнаныя ўнікальнымі геалагічнымі аб'ектамі. Аб гэтым паведамляе БЕЛТА са спасылкай на прэс-службу Міністэрства прыродных рэсурсаў і аховы навакольнага асяроддзя па выніках пасяджэння навукоўца савета НПЦ па геалогіі, дзе разглядалася гэтае пытанне.

"За ўсю гісторыю гэта сёмы метэарыт на тэрыторыі Беларусі і першае пацверджанае падзенне. Рашэннем Камісіі па мінералагічных, палеанталагічных і іншых унікальных геалагічных матэрыялах Мінпрыроды знойдзеныя метэарыты прызнаныя ўнікальным геалагічным аб'ектам", - паведамілі ў прэс-службе Мінпрыроды.

Як паведамлялася, 25 снежня 2024 года тры камеры Беларускай метэорнай сеткі зафіксавалі супербалід з яркасцю, блізкай да яркасці поўнага Месяца. Ён праляцеў над Мінскам і ўпаў паблізу Смалявічаў у выглядзе метэарытаў. Агульная маса метэарытнага рэчыва ацэньваецца ў некалькі кілаграмаў.