Беларускіх школьнікаў у новым навучальным годзе чакае шэраг змяненняў

Вызваленне ад ЦЭ, дзелавы стыль і бясплатны падвоз. Школьнікаў у новым навучальным годзе чакае шэраг змяненняў.

Так, напрыклад, навучэнцы 11-х класаў па заключэнні ўрачэбна-кансультацыйнай камісіі могуць быць вызвалены ад цэнтралізаванага экзамену па медыцынскіх паказаннях. У той час як зараз гэта норма дзейнічае толькі для навучэнцаў 9-х класаў.

Акрамя гэтага, з 1 верасня замацаваны абавязак для школьнікаў прытрымлівацца дзелавога стылю адзення. Выключэнне складаюць урокі фізкультуры і працы. Нагадаем, у краіне праводзіўся эксперымент са школьнай формай, і капсульная форма ўжо знаёмая. Зараз гэта зацвердзілі на заканадаўчым узроўні.

Яшчэ адно змяненне датычыцца школьных аўтобусаў. Яны будуць падвозіць навучэнцаў да месцаў правядзення разнастайных адукацыйных конкурсаў, экскурсій, фізкультурна-аздараўленчых мерапрыемстваў і бясплатна перавозіць школьнікаў у межах населенага пункта да ўстановы адукацыі.