Да канца сакавіка пры Палаце прадстаўнікоў плануецца сфарміраваць Моладзевы савет

Моладзевы савет створаць пры Палаце прадстаўнікоў, паведаміў журналістам старшыня Пастаяннай камісіі па ахове здароўя, фізічнай культуры, сямейнай і моладзевай палітыцы Палаты прадстаўнікоў Нацыянальнага сходу Валерый Малашка, паведамляе БЕЛТА.

"110 дэпутацкіх акруг і, адпаведна, 110 маладых людзей ад 18 да 31 года будуць уключаны ў Моладзевы савет пры Палаце прадстаўнікоў. У агульнай масе гэта працуючая моладзь", - расказаў Валерый Малашка.

Паводле яго слоў, савет плануецца сфарміраваць да канца сакавіка. "Маладыя людзі будуць праяўляць актыўнасць у тых формах, у якіх працуе дэпутат. Гэта прыёмы грамадзян, прамыя тэлефонныя лініі, наведванне працоўных калектываў, удзел у грамадскім жыцці раёнаў, што ўключаны ў дэпутацкую акругу. Гэта вельмі важна. Гэта будзе як мінімум скіравана на тое, каб сфарміраваць сабе годную змену", - адзначыў парламентарый.