ДАІ Беларусі ўзмоцніць кантроль па захаванні бяспекі ў маршрутках

З 8 па 10 ліпеня супрацоўнікі ДАІ ўзмоцнена правяраюць вадзіцеляў маршрутак. Гэта датычыцца і гарадскіх, і міжгародных перавозчыкаў. Па 10 ліпеня запланаваны рэйды па ўсёй краіне.

Такая маштабная праверка пасажырскіх мікрааўтобусаў праводзілася вясной. Тады было выяўлена звыш тысячы парушэнняў. У асноўным гэта было ігнараванне рамянёў бяспекі.

Павел Санкевіч, прадстаўнік ГУ ДАІ МУС Беларусі:

"Асноўную ўвагу інспектары накіруюць на спыненне грубых парушэнняў Правіл дарожнага руху: кіраванне транспартам у стане ап'янення, незахаванне ўстаноўленай хуткасці, перавозку пасажыраў, не прышпіленых рамянямі бяспекі ў міжгародным і прыгарадным паведамленні, няспраўным транспартам альбо пры ўмове, калі ўдзел у дарожным руху забаронены".

Інспектары ДАІ звернуць увагу на хуткасныя рэжымы, стан вадзіцеляў, наяўнасць тэхпашпарта на маршрутнае таксі.