Дзеці з ДНР пабывалі з экскурсіяй у Віцебску

Прагулка на цеплаходзе, катанне на атракцыёнах, наведванне музея. Дзеці з Данецкай Народнай Рэспублікі, якія знаходзяцца на адпачынку ў санаторыі "Жамчужына" Лепельскага раёна, 3 чэрвеня пабывалі на экскурсіі ў Віцебску.

У краязнаўчым музеі дзецям уручылі падарункі ад прадпрыемстваў абласнога цэнтра, грамадскага аб'яднання "Белая Русь" і неабыякавых жыхароў паўночнага рэгіёна. Дзеці выступілі з творчым нумарам пра сяброўства.

У рамках гуманітарнага праекта "Дзецям - дзяцінства без вайны" Віцебскі абласны савет дэпутатаў сумесна з грамадскім аб'яднаннем "Белая Русь" на працягу некалькіх гадоў аказвае дапамогу юным жыхарам ДНР і ЛНР, арганізуе дабрачынныя акцыі і зборы, садзейнічае аздараўленню і рэабілітацыі дзяцей у санаторыях паўночнага рэгіёна.