Кошт навучання застанецца на ранейшым узроўні - Іванец

Сёння дзяржава стварае ўсе неабходныя ўмовы для тых, хто хоча атрымаць якасную вышэйшую адукацыю. Пра гэта журналістам заявіў міністр адукацыі Беларусі Андрэй Іванец, каменціруючы пытанне наконт кошту навучання ў ВНУ і каледжах краіны, паведамляе БЕЛТА.

"Мы практычна два гады не павышалі кошт навучання, і на гэты навучальны год прынята рашэнне захаваць яго на тым жа ўзроўні. Гэта датычыцца як устаноў сярэдняй спецыяльнай, так і вышэйшай адукацыі. Сёння дзяржава стварае ўсе неабходныя ўмовы для тых, хто хоча атрымаць якасную вышэйшую адукацыю. І кожны малады чалавек, які скончыць навучанне на платнай форме, па сваім жаданні зможа атрымаць статус маладога спецыяліста, першае гарантаванае рабочае месца, каб стаць прафесіяналам", - падкрэсліў Андрэй Іванец.

Міністр адзначыў, што зараз у ВНУ гарачая пара - ідуць уступныя экзамены ў абітурыентаў, якія паступаюць па мэтавым накіраванні. "Вельмі хутка - з 12 ліпеня - пачнецца прыём ужо для тых, хто паступае па агульным конкурсе на бюджэтныя месцы. Да 1 жніўня прадоўжыцца прыём для паступлення на платную форму атрымання адукацыі. Хацеў бы адзначыць, што сёння ў нашай краіне прыём і на бюджэт, і на платную форму адпавядае патрэбнасцям эканомікі ў кадрах", - праінфармаваў кіраўнік адукацыйнага ведамства.