Кожны марыць. Тры выпрабаванні павінны прайсці ўдзельнікі адбору праекта "Цягнік Памяці"

Удзельнікаў рэспубліканскага праекта "Цягнік Памяці" выберуць сёння ў Нацыянальным цэнтры мастацкай творчасці дзяцей і моладзі. Тут пройдзе другі дзень адкрытага конкурсу "Я патрыёт сваёй краіны". Пераможцы стануць удзельнікамі ўнікальнай двухтыднёвай паездкі па гарадах і месцах баявой славы.

"Цягнік Памяці", праект які не мае патрэбы ў дадатковай рэкламе ў школьнай аўдыторыі. На запаветны цягнік мараць трапіць тысячы школьнікаў. Бо ў рамках праекта старшакласнікі з Беларусі, Расіі і краін СНД штогод здзяйсняюць двухтыднёвае падарожжа на спецыяльным цягніку па гарадах і месцах баявой славы, звязаных з гісторыяй Вялікай Айчыннай вайны.

Каб стаць удзельнікам знакавага маршруту, неабходна перамагчы ў рэспубліканскім конкурсе "Я патрыёт сваёй краіны". Усяго выпрабаванняў будзе тры: партфоліа, матывацыйны ліст і эсэ.

Культурная дыпламатыя ў беларускіх школьнікаў - сярод прыярытэтных задач удзелу. Бо так важна паказаць родную Беларусь вачамі патрыёта, распавесці пра нясхільны дух савецкага народа і пра подзвігі беларускіх партызан і падпольшчыкаў. І кожны марыць пра сваё: новых сяброў, уражанні і веды.

Важная рыса праекта - пераемнасць. Перад рэспубліканскім фіналам дзяцей прыйшлі падтрымаць удзельнікі мінулых гадоў праекта. Лайфхакі, словы падтрымкі, настойлівыя рэкамендацыі сябраваць у паездцы з журналістамі і, вядома, асабістая падборка месцаў да наведвання ва ўсіх гарадах.

"Цягнік Памяці" сёлета адправіцца ў падарожжа з 21 чэрвеня па 5 ліпеня. Хлопцы і дзяўчаты наведаюць рэкордныя 15 гарадоў Беларусі і Расіі, аб'яднаныя святкаваннем 80-годдзя Вялікай Перамогі.