МУС Беларусі раскрыла карупцыйную схему ў нафтахімічнай галіне

9 ліпеня ў МУС паведамілі, што ўстаноўлены факты атрымання хабараў на працягу працяглага часу трыма службовымі асобамі двух нафтахімічных прадпрыемстваў.

Аператыўнае суправаджэнне вялі супрацоўнікі службы БЭЗ Гомеля і Гродна.

Дзяніс Сцепанкоў, намначальніка ГУБЭЗ МУС Беларусі:

"Фігуранты ўступалі ў змову з заснавальнікам адной з прыватных арганізацый. За незаконную матэрыяльную ўзнагароду складалі тэхнічныя заданні на закуп вымяральнага абсталявання для патрэб сваіх заводаў такім чынам, каб забяспечыць бізнесмену перамогу ў тэндэры. Следчымі ўзбуджаны крымінальныя справы за атрыманне хабараў. Санкцыя артыкула прадугледжвае да 10 гадоў пазбаўлення волі".

Па гэтай справе праваахоўнікі яшчэ працуюць, падрабязнасцяў не паведамляюць у інтарэсах следства. Але як падкрэслілі ў МУС, яны на пастаяннай аснове працуюць па выяўленні сістэмнай дзелавой карупцыі.