Новы дзіцячы сад з басейнам, музычнай залай і медыцынскім блокам адкрыўся ў Лагойску

З клопатам і ўвагай да самых маленькіх. 4 красавіка ў Лагойску адкрыўся новы дзіцячы сад. Ад інтэлектуальнай робататэхнікі і інтэрактыўных пакояў да басейна і гарадка бяспекі. Для развіцця і адукацыі ў дзіцячым садку 2 рэсурсныя цэнтры з паглыбленнем у эканавуку і прыкладныя дысцыпліны.

У Лагойску сёння радасная падзея - дашкольнае наваселле ў мікрараёне Паўднёвы захад. Тут актыўна будуецца жыллё для маладых і сем’яў з дзецьмі, таму інфраструктура для выхавання і адукацыі самых маленькіх асабліва запатрабавана. Мультыпрофільны цэнтр разлічаны на 200 месцаў. Заахвочваць маленькіх гарэз будуць навукай і спортам.

Праект дашкольнай установы адукацыі нетыповы. Будаўнікам спатрэбілася карпатліва папрацаваць, каб узвесці будынак на ўзгорыстых ландшафтах лагойскай зямлі. Літаральна на наступным тыдні, 7 красавіка, пачнецца адаптацыя першых наведвальнікаў.