У БДПУ стартуюць дні адчыненых дзвярэй, прадугледжаны і дыстанцыйны фармат

У вядучым педагагічным універсітэце Беларусі 28 кастрычніка стартуюць Дні адчыненых дзвярэй. На працягу тыдня ў дні школьных канікул у БДПУ ў будучых абітурыентаў і бацькоў будзе магчымасць сустрэцца з кіраўніцтвам інстытутаў і факультэтаў, а таксама выкладчыкамі і студэнтамі.

Можна будзе атрымаць інфармацыю аб магчымасці паступлення, спецыяльнасцях, умовах засялення і пражывання ў інтэрнатах. Самі студэнты распавядуць аб моладзевых праектах, культурным і спартыўным жыцці ўніверсітэта. Дарэчы, для іншагародніх школьнікаў прадугледжаны дыстанцыйны фармат. Будзе арганізавана анлайн-трансляцыя сустрэч.

Асаблівая ўвага - навучэнцам педагагічных класаў. За амаль 10 гадоў іх колькасць у Беларусі павялічылася ў 8 разоў.

У лістападзе Беларускаму педагагічнаму ўніверсітэту імя Максіма Танка спаўняецца 110 гадоў. Сёння ў ВНУ на ўсіх узроўнях падрыхтоўкі навучаецца каля 10 тыс. студэнтаў, уключаючы амаль 1 тыс. іншаземцаў. Найбольш запатрабаваны спецыяльнасці псіхалагічнага профілю, сацыяльна-педагагічная праца і дашкольная адукацыя.