У Беларусі адзначаюць Міжнародны дзень сям'і

15 мая ў Беларусі адзначаюць Міжнародны дзень сям'і!

У нашай краіне налічваецца 2,6 млн. сямей, з якіх больш як 43 % выхоўваюць дзяцей да 18 гадоў. Прэстыж сям'і ў Беларусі расце. Толькі летась больш як 60 % беларусаў заключылі першы шлюб. Усяго ж у 2024-м больш як 46 тысяч пар змацавалі свае адносіны шлюбнай сувяззю.

Для большасці сямей у нашай рэспубліцы моцным фундаментам застаецца нараджэнне дзяцей. Колькасць шматдзетных з кожным годам расце. Траіх і больш дзяцей у Беларусі сёння выхоўваюць звыш 9 % ад агульнай колькасці. А гэта парадку 123 тысяч сямей. Самая вялікая колькасць шматдзетных пражывае ў Брэсцкай, Гомельскай і Мінскай абласцях.

Тэндэнцыям шматдзетнасці шмат у чым спрыяюць меры, якія прымаюцца на дзяржаўным узроўні: ад выплаты дапамог у сувязі з нараджэннем і выхаваннем дзяцей да гарантый і льгот у сферы адукацыі, аховы здароўя, працоўнага, падатковага, а таксама пенсіённага заканадаўства.