У Беларусі змяніліся правілы вядзення школьнага дзённіка

Міністэрства адукацыі Беларусі змяніла парадак запаўнення школьнага дзённіка. Адпаведная пастанова з'явілася на Нацыянальным прававым інтэрнэт-партале, паведамляе 1prof.by .

Нарматыўны прававы акт уступае ў сілу з 1 верасня 2025 года. У дакуменце ёсць магчымасць параўнаць асобныя палажэнні закона ў папярэдняй і цяперашняй рэдакцыях.

З новаўвядзенняў:

- знікла патрабаванне аб абавязковым запаўненні раскладу заняткаў на тытульным лісце;

- асобна паказана, што вучань можа скарачаць запіс хатняга задання і назвы прадметаў, правільныя скарачэнні дзецям падкажа настаўнік;

- дапушчаюцца выпраўленні шляхам закрэслівання рысай няправільнага запісу і надпісы зверху правільнага.

Тэма выпраўленняў у дзённіку наогул з'яўляецца адной з "любімых" у настаўнікаў і бацькоў. Зрэшты, яшчэ ў пачатку бягучага навучальнага года ў Міністэрстве адукацыі супакойвалі мам і тат: выпраўленні ў дзённіку не павінны быць падставай для пакупкі новага асобніка галоўнага вучнёўскага «дакумента».

У астатнім правілы засталіся ранейшымі: пісаць акуратна, выкарыстоўваць толькі ручку з сінімі або фіялетавымі чарніламі, не выкарыстоўваць каляровыя алоўкі, фламастэры і налепкі. Хатняе заданне, назвы месяцаў і навучальных прадметаў варта пісаць з маленькай літары.