У Мінгарвыканкаме вызначыліся з датамі апошніх званкоў і выпускных

На аператыўнай нарадзе ў Мінгарвыканкаме 12 мая абмеркавалі, калі пройдуць мерапрыемствы, запланаваныя да заканчэння навучальнага года. Пра гэта паведамляе агенцтва "Мінск-Навіны".

"Урачыстыя лінейкі ва ўстановах адукацыі пройдуць 24 мая а 10-й гадзіне. Акрамя таго, у 12:30 навучэнцы ўскладуць кветкі да стэлы "Мінск - горад-герой". А ў 17:00 у "Мінск-Арэне" адбудзецца свята апошняга званка, - адзначыла старшыня камітэта па адукацыі Мінгарвыканкама Марына Ільіна. - Выпускныя вечары пройдуць 13 чэрвеня з 20:00 ва ўстановах адукацыі. Выключэнне - Заводскі раён, дзе сёлета праводзіцца пілотны праект. Пасля ўрачыстага ўручэння атэстатаў выпускнікі збяруцца ў "Чыжоўка-Арэне" для агульнага святкавання. У будучыні гэты вопыт плануецца распаўсюдзіць і на іншыя раёны горада".

Таксама была закранута тэма летняга адпачынку. Сёлета плануецца аздаравіць амаль 78 тыс. навучэнцаў. Гэта найбольшы паказчык за апошнія 5 гадоў. Лагеры пачнуць працаваць у асноўнай сваёй масе з 2 чэрвеня. У загарадных лагерах запланаваны 5 змен па 15 дзён, у гарадскіх - 4 змены.

Абмяркоўвалася і падрыхтоўка да цэнтралізаванага экзамену. "Поўнасцю вызначаны прадметы, усе выпускнікі зарэгістраваныя, кожны з іх ведае месца, дзе будуць здаваць экзамен. Правераны ўвесь аўдыторны фонд. У зімовы перыяд праводзілася рэпетыцыя ЦЭ. Яна паказала, што Мінск гатовы да правядзення экзамену ў штатным рэжыме", - абазначыла Марына Ільіна.